23 ungfólk fara á ráðstevnu um trúboðan hjá NTM í North Cotes

Hósdagin 23. mars fara 25 fólk úr Føroyum til Onglands at vitja ein bíbliuskúla hjá trúboðanarfelagsskapinum New Tribes Mission (NTM).

Leiðin gongur til bíbliuskúlan hjá NTM í North Cotes í Onglandi í sambandi við eina ráðstevnu har á skúlanum.

Ráðstevnan eitur REACH – at røkka menniskjum. NTM hevur nevniliga sum endamál at senda fólk út at røkka teimum, sum enn ikki hava hoyrt evangeliið um Jesus.

Ráðstevnan er fyri aldursbólkin 16-30 ár, har trúboðarar undirvísa og kunna um teirra arbeiði og um, hvussu Gud virkar.

Ferðalagið, sum fer úr Føroyum hósdag og kemur aftur mánadag, telur í alt 25 fólk, har tey flestu koma úr samkomuni í Betesda.

Ferðaleiðarar eru Eydna og Dávur Johannesen, og so verða 23 ung í aldrinum 16-25 ár saman við teimum.

Vit ynskja teimum ein góðan túr – HARRIN signi og varðveiti tykkum á ferðini, og vónandi fáa tit nógv burturúr.