Seinnapartin mikudagin var hugnaløta saman við foreldrum fyri 7. floks næmingunum, sum í vetur hava luttikið í Didasko.

Seinastu árini hevur samkoman í Betesda – í góðum samstarvi við skúla og foreldur – havt grundleggjandi bíbliuundirvísing fyri 7. floks næmingar.

Við skúlaársbyrjan fáa 7. floks næmingarnir høvi at velja, um teirra undirvísing í Kristni skal fara fram í kirkjuni, Betesda ella í skúlanum.

Mikudagin 21. januar var skeiðið lokið, og í tí sambandi varð skipað fyri hugnaløtu, har næmingarnir fingu handað skreytblað og eina gávu frá samkomuni í Betesda.

Evnini, sum verða gjøgnumgingin, eru tey grundleggjandi í Bíbliuni, so sum skapanin, guddómurin,  Bíblian, frelsa, dópur osfr

Navnið „Didasko“ kemur úr grikskum og merkir „at læra“. Jesus brúkar hetta orðið í Matteus 28:18-20, tá hann gav tey stóru missiónsboðini: Tá steig Jesus fram, talaði til teirra og segði: „Mær er givið alt vald í Himli og á jørð. Farið tí út og gerið øll fólkasløg til lærisveinar, doypið teir til navn Faðirsins, Sonarins og Heilaga Andans, og lærið teir at halda alt, ið Eg havi boðið tykkum! Og Eg eri við tykkum allar dagar, líka til enda tíðarinnar.“

Samkoman í Betesda er takksom fyri hetta høvið, og vit takka skúla og foreldrum fyri álit og gott samstarv.

„Náði Harrans Jesusar veri við øllum!“ (Opinb. 22:21)