Bíbliuløta fyri vaksin – í sunnudagsskúlanum
SUNNUDAGIN 7. JUNI BYRJA VIT EITT NÝTT ÁTAK Í SUNNUDAGSSKÚLANUM VIÐ BÍBLIULØTU FYRI TEIMUM VAKSNU, MEÐAN BØRNINI ERU Í FLOKKUNUM OG HOYRA BÍBLIUSØGU.
Foreldur at sunnudagsskúlabørnum hava gjørt vart við, at tey sakna eina løtu í Betesda fyri tey vaksnu um middagsleitið sunnudagar, tá fleiri familjur longu eru í sunnudagsskúla.
Fyri flestu foreldur man hetta vera eitt tað besta høvið til eina róliga løtu, har tey vaksnu í familjuni fáa ein boðskap úr Bíbliuni.
Vit byrja sunnudagin 7. juni
Til tess at nøkta henda tørv fara vit í Betesda nú at gera eina roynd at hava eina fasta bíbliuløtu í salinum fyri tey vaksnu tann seinna hálva tíman í sunnudagsskúlanum, tá børnini eru í flokkunum.
Eg komi at hava ábyrgdina og skipa hesa løtuna, har ymsir fyrireikaðir talarar, bæði lokalir og vitjandi, koma at hava boðskapin – og vit byrja 7. juni:
• 7. juni fer Símun Absalonsen at tala út frá 1. og 2. kapitli í Rómbrævinum (fyrsti partur)
• 14. juni kemur Jens Olsen av Toftum at tala út frá Efesusbrævinum (fyrsti partur), undir yvirskriftini: “Eg í Honum”
Eftir hetta fer sunnudagsskúlin í summarferiu, sum varir til um hálvan august, tá byrjað verður aftur. Tá er ætlanin at halda fram við bíbliuløtuni.
Skráin fyri morgunmøtið og sunnudagsskúlan verður nú henda:
11:00-12:15 Morgunmøti
12:15-13:00 Kaffi í gongini (beint eftir morgunmøtið)
12:30-13:00 Sunnudagsskúlin byrjar við sangi í salinum
13:00-13:30 Børnini fara í flokkarnar at hoyra bíbliusøgu
13:00-13:30 Bíbliuløta í salinum fyri tey vaksnu
Vit vóna, at HARRIN fer at signa, og biðja Hann leiða okkum eftir ráði Sínum. (Sálm. 73:24)
“Byggir ikki HARRIN húsið, so arbeiða teir til ónyttu, sum byggja at tí; varðar ikki HARRIN staðin, so vakir vaktarin til ónyttu.” (Sálm. 127:1)
Takk, um tit bera hetta víðari til onnur, so fleiri fáa høvi at koma til hesar bíbliuløturnar, ið hava til endamáls at geva okkum øllum góðan andaligan førning inn í okkara nógv upptikna dagligdag.
Hjartaliga vælkomin 
Vegna leiðsluna
John Færø
