Kom í Betesda og hoyr 23 ungdómar greiða frá um trúboðanarmøguleikar

Mikukvøldið 3. mai 2023 kl. 20 ert tú hjartaliga vælkomin í Betesda at hoyra og síggja áhugaverda kunning um trúboðanarmøguleikar, sum 23 ungfólk fara at greiða frá.

Frá 24. til 26. mars í ár var ein bólkur av 23 ungfólkum og 2 ferðaleiðarum í North Cotes í Onglandi, har tey luttóku á eini trúboðanarlegu.

Legan, sum hevði heitið REACH, varð á bíbliuskúlanum hjá altjóða trúboðanarfelagsskapinum NTM (New Tribes Mission).

REACH hevur til endamál at eggja ungum at vera við til at náa tey, sum ongantíð hava hoyrt gleðiboðskapin.

Mikukvøldið fara tey ungu at greiða frá leguni, siga eitt sindur um skúlan og annars, hvat tey hoyrdu og upplivdu á leguni.

Hjartaliga vælkomin í Betesda mikukvøldið kl. 20, har løtan endar við einum góðum drekkamunni, og høvi verður at heilsa upp á ungfólkini og seta spurningar.