Komandi sunnukvøld, 10. september kl. 18, verður ein forkunnugur møguleiki at hoyra ein áhugaverdan og álvarsaman boðskap um, hvat Bíblian lærir um afturkomu Kristusar og Guds profetisku ætlan. Dr. Anthony George úr USA talar, og Sangkórið í Betesda syngur. Hjartaliga vælkomin.

Dr. Anthony George, sum er leiðandi pastor í First Baptist Church of Atlanta í statinum Georgia í USA, er í hesum døgum á stuttari vitjan her í Føroyum saman við vinfólkum sínum Judy og Óla á Grømma Jacobsen.

Óli er klaksvíkingur. Í 1965 fór hann til USA á trúboðaravenjingarskúla hjá NTM. Eftir hetta, í 1968, fóru hann og konan Judy í fulltíðartænastu hjá NTM. Fyrst á trúboðaramálskúla í 15 ár, síðan 10 ár á Filipsoyggjunum, og síðan 1993 sum partur av altjóða leiðsluni fyri NTM, har tey framvegis eru virkin.

Tey bæði vitja javnan heim til Føroya, og hesaferð hava tey bjóðað vinmanni sínum Dr. Anthony George við. Hann steðgar bert fáar dagar, og tað er í tí sambandi, at Anthony fer at tala í Betesda á møtinum nú sunnukvøldið 10. september 2023 kl. 18:00, har eisini sangkórið í Betesda fer at syngja.

Samkoman ”First Baptist Church of Atlanta”, har Anthony dagliga virkar, fevnir um fólk við uppruna úr 98 ymiskum londum og er sostatt ein tann etniskt mest fjølbroytta samkoman í USA.

Anthony George brennur fyri at undirvísa í Bíbliuni, og at seta boðskap Bíbliunnar inn í dagliga lív okkara. Serliga hevur hann granskað profetisku ætlan Guds og teknini um uppfylling av teimum profetium, sum enn ikki eru uppfylt.

Dr. Anthony George er útbúgvin á Criswell College í Dallas, Texas, og fekk sín master og doktaraheiti á Southeastern Baptist Theological Seminary i Wake Forest, North Carolina.

Hjartaliga vælkomin í Betesda sunnukvøldið kl. 18.

Í løtuni verður skipað fyri bønarløtu í Betesda hvønn gerandismorgun – mánadag til fríggjadag – kl. 07:15, har biðið verður til HARRAN, at Hann skal vitja samkomu Sína við Sínum Anda og kraft.

Tað eru ungdómar í samkomuni, sum hava tikið stig til hesa bønarløtu. Atvoldin er ikki nakað ávíst evni ella tiltak, men einans eitt ynski um, í felag, at søkja HARRAN í ákallan, bøn og tøkk, so sum Hann áleggur okkum trúgvandi at gera.

Ynski teirra ungu og okkara er, at øll í samkomuni – ung sum eldri – luttaka í hesi bønarløtu.

Dyrnar verða latnar upp kl. 07:00, og bønarløtan byrjar kl. 07:15.

Hjartaliga vælkomin.

Á uppbyggingarmøtinum mikukvøldið 9. august kl. 20 talar John Høj.

94 ára gamli John Høj er føddur í 1929, og er ein av teimum heilt fáu í samkomuni í Betesda í dag, sum hevur verið partur av samkomuni heilt aftur í 1930 árini.

Heilt frá ungum av hevur John tikið ábyrgd og verið trúfastur í samkomuni, her hann enn í dag tekur lut.

Á møtinum mikukvøldið kl. 20 verður høvi at hoyra ein boðskap frá John Høj.

Hjartaliga vælkomin 🙂

3, 4 og 5 august 2023 er Summarfestivalurin aftur á skrá í og kunnu væntast nógv fólk at vitja Klaksvík hesar dagar. Spennandi, og verið øll vælkomin til bý okkara 😊

Í Betesda verður Opið Hús øll kvøldini, meðan Summarfestivalurin er, og eru øll vælkomin at hyggja inn á gólvið til eina hvíld ella ein kaffimunn og møguleikan at hitta og tosað við kend sum ókend fólk.

Hóskvøldið verður byrjað kl 21:00, meðan fríggjakvøldið og leygarkvøldið opnar húsið kl 20:00

Fríggjakvøldið verður sangløta um miðnáttarleitið, sum ungdómur í Betesda skipar fyri. Leygarkvøldið verður aftur sangløta, sum sangbólkurin Vitin við gestum, skipar fyri. Vónandi síggjast nógv fólk eisini til hesar løturnar.

Verið vælkomin til: „Opið Hús í Betesda á Summarfestivalinum 2023“

1. januar 1980 fór Sonni Poulsen av Sandi til Onglands á bíbliuskúla hjá NTM. 

Í juni 1981 giftist hann við Julie, sum er úr USA.

Í 1985 fóru tey í fulltíðar tænastu fyri HARRAN í Papua Ný Guinea, har tey virkaðu í 21 ár.

Eftir hetta vóru tey í USA í 8 ár at hjálpa mammu Julie og børnunum.

Í 2015 fluttu Julie og Sonni til Onglands at undirvísa á skúlanum hjá NTM í North Cotes uttan fyri Grimsby.

Fyri 3 árum síðani gjørdist Sonni sjúkur, og tey eru nú givin í heiltíðartænastuni vegna heilsuna.

Síðan tá hava tey búð í USA, har Sonni hevur havt vanligt arbeiði.

Julie og Sonni eiga 4 børn og 19 barnabørn.  Ein dóttir og ein sonur virka fyri HARRAN í Papua Ný Guinea innan NTM.

Tey eru: Annika, gift við Simon úr Norður Írlandi, og Brian, giftur við Lily úr USA.

Julie og Sonni eru í løtuni her heima og vitja, og mikukvøldið verða tey við á møtinum í Betesda kl. 20, har høvi verður at hoyra ein boðskap frá Sonna og sjálvandi eisini at heilsa upp á tey bæði.

Hjartaliga vælkomin 😊