Tá Jógvan Júst Rasmussen fríggjadagin 14. juni 2024 legði út greinina “Sælur ert tú, sum hoyrir” her á heimasíðuni, var tað samstundis grein nr. 100 hjá honum í teiginum “Orð” her á betesda.fo.

Tá HARRIN í orði Sínum umrøður samkomuna, samanber Hann hana eitt nú við eitt likam. Í Róm. 12,4 sigur Hann, at “.. eins og vit hava nógvar limir á einum likami, men allir limirnir hava ikki sama starv”.

Víðari lesa vit í 2. Kor. 8,12, at “.. viljin er væl fagnaður, har sum hann er – eftir tí, sum hann hevur, og ikki eftir tí, sum hann ikki hevur”. Soleiðis biður HARRIN hvønn einstakan av okkum um at tæna Sær – tú við tínum gávum, eg við mínum o.s.fr.

Náðigávurnar og uppgávurnar í eini samkomu eru bæði ymiskar og fjølbroyttar, og her er samkoman í Betesda einki undantak. Tvørturímóti eru vit stórliga signaði við persónum, sum á mongum ymiskum økjum brúka sínar gávur, tíð og orku til HARRANS verk – Honum, sum byggir samkomu Sína.

Eitt av økjunum, har systkin okkara virka í samkomuni, er innan skriving av andaktum til heimasíðuna hjá samkomuni, betesda.fo, og tær tilhoyrandi facebook-síðurnar v.m.

Her hevur Jógvan Júst Rasmussen saman við Per Andrew Olsen, Eiriki Biskopstø, Annu Simonsen o.fl. gjørt eitt stórt og trúfast verk, har hesi hava skrivað, gjøgnumgingið, rættlisið, útvegað hóskandi myndir, lagt út o.s.fr.

Eitt toymi, sum – eins og so mong onnur – stillisliga arbeiðir saman um at breiða út hin góða boðskapin, og áðrenn ein veit av, so eru hundra greinar lagdar út – HARRIN signi verk tykkara.

Sælur ert tú, sum hoyrir

Í samband við at tað í komandi viku er Bíbliulestrarvika á skránni, fara vit á møtinum mikukvøldið 29 mai kl.20.00, at hoyra Teit Isaksen tala útfrá kapittul 1,5-2,11 í Fyrsta brævið Jóhannesar. Eftir møti verður ein drekkamunnur. Møti verður stroymt á heimasíðuni hjá Betesda. Øll eru hjartaliga vælkomin.