Bíbliulestrarvika

So fara vit aftur á ferð í Orðinum – nú í 1. Korintbrævi, kapittul 1.

Hesa komandi vikuna fara vit aftur á ferð í Orðinum, har vit sum samkoma savna okkum um eitt brot úr Bíbliuni, sum vit hoyra boðskapir útfrá og kunnu hugsa og samtala um okkara millum.

Bíbliuteksturin, vit gjøgumganga hesa vikuna, er 1. Korintbræv, kapittul 1, sum vit heita á systkinini um at lesa.

Á møtinum mikukvøldið 1. feb. kl. 20 verður innleitt og talað um trupulleikan í samkomuni í Korint við støði í 1. Kor. 1:1-17. Sámal Mikkelsen og Áron Sofus Vest tala, Bjørn og Maria á Lakjuni Simonsen leiða sangin. Eftir møtið verður ein drekkamunnur.

Á møtinum sunnukvøldið 5. feb. kl. 18 er yvirskriftin: „Evangeliið er heiminum dárskapur“ (1. Kor. 1:18-31). John Færø talar, Betesdakórið syngur og leiðir felagssangin, Anna Simonsen sigur eina søgu, og Durita Hummeland hevur ein vitnisburð. Eisini verður dópur á hesum møtinum. Eftir møtið verður nátturði.

Hjartaliga vælkomin – vit síggjast 🙂

Ongin mammukafe

Vegna nógva sjúku ímillum smáu børnini, er ongin mammukafe í løtuni. Lýst verður tá ið byrja verður aftur.

Eldrahugni fríggjadagin 27. januar kl. 15

Komandi fríggjadag 27. januar verður eldrahugni í Betesda kl. 15.00- Ragnar og Elisabeth Niclassen fara at hugleiða um teirra lív og uppvøkstur. Myndir verða vístar. Kvartettin syngur.

Serligt kunningartiltak um Juvel II sunnukvøldið kl. 18

Á møtinum í Betesda sunnukvøldið kl. 18 fara fólk, sum hava verið við Juvel II, at greiða frá arbeiðnum við trúboðanarskipinum, sum hvørt summar boðar evangeliið í Grønlandi.

Á møtinum síggja vit ein stuttan film um partar av virkseminum hjá Juvel II.

Dávur Joensen og Djóni Joensen siga frá teirra royndum umborð, og Karsten Hansen kunnar um tænastuna.

Ludvík Petersen og Dánjal Jacobsen syngja, og vit fáa ein boðskap frá Sámali Mikkelsen.

Eftir møti verður ein drekkamuður.

Hjartaliga vælkomin 🙂

Kvinnumøti

Fríggjakvøldið 13. januar kl. 20 verður kvinnumøti í Betesda.

Vit fara hesar komandi mánaðarnir at hoyra kvinnur, tala um ymiskar kvinnur í Bíbliuni.

Hesa ferð verður tað Else Djurhuus, sum fer at tala um Martu og Mariu.

Aftaná verður ein drekkamuður við onkrum góðum afturvið, og høvið verður at samtala og hugna sær saman.

Allar kvinnur – ungar sum eldri – eru hjartaliga vælkomnar.

Uppbyggingarmøti mikukvøldið kl. 20 – dópur verður

Mikukvøldið 11. januar 2023 kl. 20 verður uppbyggingarmøti, har høvi verður at hoyra boðskapir út frá Orði Guds.

Somuleiðis verður dópur á hesum møtinum.

Tað eru ungfólk, ið hava biðið um dóp. Hesi hava ein greiðan vitnisburð um teirra trúgv á HARRAN Jesus Kristus, og tí er einki til hindurs fyri, at tey verða doypt, so sum Bíblian lærir, at ein trúgvandi eigur at gera.

Hjartaliga vælkomin 🙂

Ragnar Niclasen talar á møtinum í kvøld, mikukvøldið 4. januar kl. 20

Liz og Ragnar Niclasen, ið virka sum fulltíðar trúboðarar á Filipsoyggjum, eru heima á vitjan í heum døgum, og fer Ragnar at hava eitt orð á møtinum í kvøld, mikukvøldið 4. januar 2023 kl. 20.

Ragnar fór í 1974 á bíbliuskúla hjá NTM í býnum Waukesha í statinum Wisconsin í USA og fór síðan saman við konu síni, Liz úr Kanada, í fulltíðartænastu fyri HARRAN sum trúboðari hjá NTM á Filipsoyggjum.

Árini 2008 til 2014 virkaðu tey í Onglandi, men eru í dag aftur á Filipsoyggjum.

Liz og Ragnar eiga synirnar Ryan og Craig. Í dag virka Craig og konan, Claire, fyri HARRAN innan trúboðanarfelagsskapin OM í Birmingham í Onglandi. Tey bæði hava verið heima í Føroyum um jólahøgtíðina, og eru farin avstaðaftur.

Ragnar og Liz verða longri heima hesaferð, og tey verða, sum nevnt, við á møtinum í kvøld, mikukvøldið 4. januar 2023 kl. 20.

Ein drekkamunnur verður aftaná, har høvi eisini verður at heilsa upp á tey bæði og njóta samveru við hvønn annan.

Hjartaliga vælkomin 🙂

Nýggjársaftan í Betesda kl. 17 til umleið kl. 18.15

Undir heitinum “Við árslok” har dentur verður lagdur á at: Samkoman í Betesda er partur av trúboðanarverkinum”, byrjar løtan longu kl. 16,30 við orgultónleiki, síðani spælir “hóskvøldsungdómurin” nøkur lættari løg og aftaná verður klavertónleikur.

Kl. 17 verður felagssangurin: “Stór er tín trúfesti”, Sámal Mikkelsen hevur nøkur orð um: “Samkomuna og trúboðan”, ein stutt bønarløta og kórsangur verður eisini í samband við ársskiftið.

Vit hava øll gott av at seta okkum niður eina løtu t.d. nýggjársaftan, hugsa um og grunda á árið í nú fer og vit koma inn í eitt nýtt ár við vónum og avbjóðingum og vit seta okkum spurningar!

Øll í øllum aldrum eru hjartaliga vælkomin. – Dávid sigur í sálmi 111,2: Stór eru verk Harrans; øll, sum hava gleði sína í teimum, grunda á tey.

Mikukvøldið kl. 20 verður áhugaverd kunning um styttri missiónsluttøkur

Á møtinum mikukvøldið kl. 20 fara Ásbjørg Hjelm, Anja Nielsen, Sámal Rasmussen og Hans Elttør at greiða frá teirra luttøkum í missión hetta seinasta árið.

Um tú hevur áhuga í at hoyra um ymsar møguleikar fyri luttøku í missiónarbeiði, so er hetta eitt gott høvi til júst tað.

Ásbjørg Hjelm fer at greiða frá hjálpararbeiði sínum í Fraklandi, har hon var nakrar vikur í heyst hjá Cecile og Jóhannes Mortensen, sum tæna HARRANUM innan trúboðanarfelagsskapin OM.

Anja Nielsen var í oktober mánað í ár í Vietnam við trúboðanarfelagsskapinum Open Doors, og fer hon at greiða frá hesi ferðini.

Sámal Rasmussen og Hans Elttør hava báðir verið umborð á Logos Hope (fyrrv. Norrønu), sum í dag er eitt av skipunum hjá trúboðanarfelagsskapinum OM, og fara at greiða frá um arbeiðið har umborð.

Dópur verður eisini á møtinum mikukvøldið.

Aftan á møtið verður ein drekkamunnur og høvi til samveru.

Hjartaliga vælkomin 🙂

AVLÝSING!

Vegna veður er avgerð tikin um at avlýsa møtið í kvøld, 2. jólakvøld, kl. 18!

Leiðslan